၁။ အဲဒါ ဘာလဲ
သုံးလ (၁၃ ပတ်) တစ်ကြိမ် ထိုးရတဲ့ ဆေးဖြစ်ပါတယ်။ ဒက်ပို (Depot) လို့လည်း လူသိများပါတယ်။ ပရိုဂျက်စတင် ဟော်မုန်းတစ်မျိုးတည်းသာ ပါဝင်ပါတယ်။ (ထိုးဆေးအနေနနဲ့ ဟော်မုန်းတစ်မျိုးပါ နှစ်လခံထိုးဆေး၊ ဟော်မုန်းနှစ်မျိုးပါ တစ်လခံထိုးဆေးတွေ ရှိပါသေးတယ်၊ အခုပြောတဲ့ သုံးလခံဆေးကတော့ အသုံးပြုမှု အများဆုံးပါပဲ)
၂။ အလုပ်လုပ်ပုံ
ကိုယ်ဝန်ရတယ်ဆိုတာ အမျိုးသမီးခန္ဓာကိုယ်ထဲက မမျိုးဥနဲ့ အမျိုးသားဆီက သုက်ပိုးနဲ့ ပေါင်းစပ်မိတဲ့အခါ ဖြစ်လာတာပါ။ ဒီပစ္စည်းလေးကတော့ အမျိုးသမီးရဲ့ ခန္ဓာကိုယ်ထဲမှာ မမျိုးဥမကြွေအောင် တားဆီးပေးပါတယ်။ ဒီတော့ သုက်ပိုးတွေဝင်လာလည်း ကိုယ်ဝန်မရနိုင်တော့ဘူးပေါ့။
အဲဒီအပြင် သားအိမ်ခေါင်းချွဲကို ပျစ်စေခြင်းအားဖြင့်လည်း သားအိမ်ခေါင်းကို ဖြတ်ပြီးမှ မမျိုးဥနဲ့သွားပေါင်းရမယ့် သုက်ပိုးတွေကို မ၀င်နိုင်အောင် တားဆီးပေးပါတယ်။
၃။ ဘယ်လိုအသုံးပြုရတာလဲ
ကျွမ်းကျင်တဲ့ဆရာဝန်၊ ဆရာမဆီမှာ မှန်မှန်ဆေးထိုးဖို့ လိုပါတယ်။ နေမကောင်းရင် ဆေးထိုးသလိုပါပဲ။ သတ်မှတ်ရက်ထက် (၂)ပတ်စောထိုးလို့ရပြီး (၄)ပတ်နောက်ကျလို့ရပါတယ်။ ဒါပေမယ့် (၁၃)ပတ်တစ်ခါ ရက်ချိန်းအတိုင်း မှန်မှန်ထိုးနိုင်ရင်တော့ အကောင်းဆုံးပါပဲ။
၎။ ထိရောက်မှု
ထိရောက်မှုရှိတဲ့ သားဆက်ခြားနည်းတွေထဲက တစ်ခု ဖြစ်ပါတယ်။ မှန်မှန်ကန်ကန်သာ အသုံးပြုမယ်ဆိုရင် အသုံးပြုပြီး ပထမတစ်နှစ်အတွင်းမှာ ကိုယ်ဝန်ရနှုန်းက အမျိုးသမီးအယောက်(၁,၀၀၀)မှာ (၃)ယောက် ရှိပြီး၊ သာမန်လောက်သာ အသုံးပြုမယ်ဆိုရင်တော့ အယောက်(၁၀၀)မှာ (၃)ယောက် ကိုယ်ဝန်ရနိုင်ပါတယ်။
၅။ အားသာချက်တွေက ဘာတွေလဲ
– သုံးလမှတစ်ခါ ထိုးရတဲ့အတွက် နေ့စဉ်ဆေးသောက်နေရတာထက်စာရင်တော့ အလုပ်ရှုပ်သက်သာပါတယ်။
– သွေးမပေါ်တတ်တာမို့ သွေးပေါ်ရင် အလုပ်ရှုပ်တယ်လို့ ခံယူတတ်တဲ့ အမျိုးသမီးတွေအတွက်ဆိုလည်း အဆင်ပြေပါတယ်။
၆။ အားနည်းချက်တွေက ဘာတွေလဲ
– ဆေးထိုးပေးမယ့် ဆရာဝန်၊ ဆရာမ၊ သို့မဟုတ် ကျွမ်းကျင်သူရဲ့ အကူအညီလိုတယ်။
– ရာသီသွေး မပေါ်တတ်ဘူး။
သူ့အာနိသင်တစ်ခုက သားအိမ်နံရံ ထူထဲမှုကို တားဆီးပေးတယ်။ မိန်းကလေးတစ်ယောက်ရဲ့ ခန္ဓာကိုယ်ထဲမှာ တစ်လတစ်ခါ သားအိမ်နံရံက ထူထဲလာတယ်၊ ဘာလို့ဆိုတော့ မမျိုးဥနဲ့ သုက်ပိုးနဲ့ပေါင်းပြီး သန္ဓေများအောင်သွားခဲ့ရင် သားအိမ်မှာ သန္ဓေတည်နိုင်အောင်လို့။ အဲဒီလို သန္ဓေအောင်မသွားတဲ့အခါ ခုနက ထူထဲထားတဲ့ သားအိမ်နံရံက ကွာကျတယ်။ အဲဒါကို ရာသီလာတယ်လို့ ခေါ်တယ်။
အခု သူက အဲဒီသားအိမ်နံရံကို ထူမလာအောင် လုပ်ပေးလိုက်တော့ အောက်ကို ဘာမှကွာကျလာစရာ မရှိတော့ဘူး။ ဒီတော့ ရာသီသွေးလည်း မဆင်းတော့ဘူးပေါ့။ ဆိုလိုတာက သွေးမပေါ်တာဟာ အထဲမှာ အပုပ်တွေအောင်း၊ အလုံးတွေတည်၊ ကင်ဆာဖြစ်မှာမဟုတ်ဘူး၊ သွေးအနေနဲ့ ဆင်းလာစရာမရှိလို့သာ ဖြစ်တယ် ဆိုတာလေး သိစေချင်ပါတယ်။ ဒါကြောင့် သွေးမပေါ်တာ စိတ်ပူစရာ မလိုဘူး။ စိတ်အေးလက်အေး နေလို့ရတယ်။ ဒါပေမယ့် ကျွန်မက သွေးပေါ်မှကြိုက်တာ ဆိုရင်တော့ ဒီနည်းလမ်းကို ရွေးချယ်ဖို့ စဉ်းစားစေချင်ပါတယ်။
– မဖြစ်မနေ သိစေချင်တာကတော့ ဒီဆေးဟာ ဆေးထိုးရပ်လိုက်ပေမယ့် ကိုယ်ဝန်ပြန်ရဖို့ လအနည်းငယ်စောင့်ရတတ်တယ် ဆိုတာပါပဲ။ ပျမ်းမျှ(၆)လကနေ (၁၀)လအထိ ကြာတတ်ပါတယ်။ လုံးဝကိုယ်ဝန်မရနိုင်တော့တာတော့ မဟုတ်ပါဘူး။ ဒါကြောင့် ကလေးတစ်ခါမှ မမွေးဖူးသေးတဲ့ အမျိုးသမီးတွေ၊ ကလေးလိုချင်ပြီဆိုရင် ချက်ချင်းရမှဖြစ်မယ် ဆိုတဲ့ အမျိုးသမီးတွေဆိုရင်တော့ မသုံးခင်မှာ သေချာစဉ်းစားကြစေချင်ပါတယ်။
၇။ ဘေးထွက်ဆိုးကျိုး ဘယ်လိုရှိလဲ
ဟော်မုန်းပါတဲ့အတွက် ဟော်မုန်းကြောင့်ဖြစ်တဲ့ ဘေးထွက်ဆိုးကျိုးတွေ ခံစားရနိုင်ပါတယ်။ ခေါင်းမူးတာ၊ ဇက်ကြောတက်တာ၊ ပျို့အန်တာ၊ ကိုယ်အလေးချိန် အပြောင်းအလဲဖြစ်တာ၊ ရင်သားတွေတင်းပြီး နာတာ၊ ဒါတွေဖြစ်နိုင်ပါတယ်။
ဆေးထိုးစမှာ သွေးကမောက်ကမ ဖြစ်တာမျိုး ရှိတတ်တယ်။ တအားများတယ်၊ ရက်ရှည်တယ်ဆိုရင်တော့ ဆရာဝန်နဲ့ ပြန်ပြပြီး လိုအပ်တဲ့ဆေးတွေ သောက်ဖို့ လိုပါမယ်။
၈။ မသုံးစွဲသင့်သော အခြေအနေများ
ရင်သားကင်ဆာ (Breast cancer) ၊ ခြေထောက်တို့ အဆုတ်တို့မှာ သွေးကြောပိတ်တာ (Deep vein thrombosis) ၊ အသည်းရောဂါ (Liver diseases) နဲ့ ပုံမမှန်သွေးဆင်းနေခြင်း (Irregular bleeding) တွေမှာ အသုံးပြုလို့ မသင့်တော်ပါဘူး။ သွေးပေါင်ချိန် (၁၆၀)နဲ့ အထက် ရှိနေရင်၊ ဆီးချိုရောဂါကို နှစ်(၂၀)နဲ့အထက် ခံစားနေရရင်၊ ပြင်းထန်တဲ့ဆီးချိုရောဂါရှိနေရင်လည်း အသုံးမပြုသင့်ပါဘူး။
တီဘီဆေး၊ အတက်ကျဆေးတွေကတော့ ဟော်မုန်းတွေရဲ့ အာနိသင်ကို လျော့ကျစေတာမို့ ဒီဆေးတွေ သောက်နေရတဲ့အချိန်ဆို ထိုးဆေးအပြင် ဟော်မုန်းမပါတဲ့ နောက်ထပ်သားဆက်ခြားနည်းတစ်ခုကို ထပ်အသုံးပြုဖို့ လိုပါမယ်။ (ဥပမာ ကွန်ဒုံး)။ ရောဂါကိုပိုဆိုးစေလို့ မဟုတ်ပါဘူး၊ ထိုးဆေးရဲ့ အာနိသင်ကို ကျစေတဲ့အတွက် ကိုယ်ဝန်ရသွားနိုင်လို့ ဖြစ်ပါတယ်။
၉။ လွဲမှားတဲ့ အယူအဆများ
– သုံးလပြည့်တိုင်း ထိုးရန်
ဒီဆေးက ရပ်လိုက်ပေမယ့် ချက်ချင်း ကိုယ်ဝန်ပြန်မရတတ်ဘူး၊ အရှိန်ကျန်တတ်တယ် ဆိုပေမယ့် ဒါဟာ တရားသေတွက်လို့ မရပါဘူး။ အမျိုးသမီးတွေက ဒီလိုအရှိန်ကျန်တတ်တယ် ဆိုတာကို သိသွားကြတဲ့အခါ (၃)လတစ်ကြိမ် မထိုးကြတော့ဘဲနဲ့ (၆)လနေမှ၊ (၉)လနေမှ ထိုးကြတာမျိုးတွေ လုပ်လာကြပါတယ်။ အဲဒီလိုသာ စိတ်ချရမယ်ဆိုရင် (၆)လခံဆေး တို့ (၉)လခံဆေး တို့ပဲ ခေါ်တော့မှာပေါ့။ တကယ်တော့ တစ်ခါထိုးရင် (၃)လအထိပဲ စိတ်ချရပါတယ်။ (၃)လပြည့်တိုင်း ပြန်ထုိုးရပါမယ်။ အရှိန်ကျန်တတ်တယ်ဆိုတာကို ဆေးထိုးရပ်ပြီး ကိုယ်ဝန်ချက်ချင်းပြန်မရတဲ့အခါ စိတ်ပူနေမှာစိုးတဲ့အတွက် ပြောတာပါ၊ ကိုယ့်ဘက်ကတော့ ကိုယ်ဝန်မလိုချင်ဘူးဆိုရင် ၃လတစ်ခါ ဆေးထပ်ထိုးဖို့ လိုပါလိမ့်မယ်။
– ဆေးထိုးစမှာ သွေးဆင်းတတ်ပါတယ်။
ဒါဟာ ကြောက်စရာ မလိုပါဘူး။ ထိုးစမှာ ဖြစ်တတ်ပါတယ်။ အချိန်တန်တဲ့အခါ အသားကျသွားပါလိမ့်မယ်။
– သွေးမပေါ်တာ ကြောက်စရာ မလိုပါဘူး။
သူ့ရဲ့အာနိသင်ကြောင့် ဖြစ်တာပါ။ အထဲမှာ အပုပ်တွေအောင်းပြီး ကင်ဆာဖြစ်တာ၊ အလုံးတွေတည်မှာ စိတ်ပူစရာ မလိုပါဘူး။
၁၀။ Your life, your choice
ဒီထိုးဆေးကတော့ အမျိုးသမီးတွေ အသုံးအများဆုံး သားဆက်ခြားနည်းလမ်းတွေထဲက တစ်ခု ဖြစ်ပါတယ်။ သားဆက်ခြားနည်းအားလုံးမှာတော့ အားသာချက်၊ အားနည်းချက်ကိုယ်စီ ရှိကြတာပါပဲ။ အဓိကကတော့ ဘယ်သူပြောလို့၊ ဘယ်ဝါတိုက်တွန်းလို့ ဆိုတာထက် ကိုယ်နဲ့သင့်တော်တဲ့ သားဆက်ခြားနည်းတစ်ခုကို ကျွမ်းကျင်သူနဲ့ တိုင်ပင်ပြီး ရွေးချယ်အသုံးပြုနိုင်ကြဖို့ လိုပါတယ်။
ဒေါက်တာ ဖြိုးသီဟ
၃၁.၁.၂၀၁၇
No comments:
Post a Comment